Ein betalingsmerknad vil gjere det vanskeleg å få nye lån, kredittar og abonnement som til dømes mobilabonnement.

Slik får du betalingsmerknader

Du kan få ein betalingsmerknad hos kredittopplysningsbyråa dersom

• det er gjennomført ei utleggsforretning
• det er registrert trekk i inntekt
• det er tatt pant i eigedom, konto eller verdipapir 
• du er registrert konkurs
• du har ei gjeldsordning

Betal kravet for å unngå betalingsmerknad, eller for å få han sletta.

Korleis blir betalingsmerknaden sletta?

Når heile kravet er betalt eller det løpande trekket i inntekta di er stoppa, blir dei aktuelle offentlege registera varsla om det. Kredittopplysningsbyråa registrerer og slettar betalingsmerknader på grunnlag av informasjonen i desse registera. Ønskjer du ei oversikt over betalingsmerknadene dine, må du derfor kontakte eit kredittopplysningsbyrå.

Frå vi har fått oppgjeret frå deg, tar det vanlegvis litt tid før slettinga er oppdatert hos finans- og kredittinstitusjonane.