Dokumentasjon

Har du veldig høge straumutgifter, må du sende oss dokumentasjon på kostnadene av eit heilt års forbruk av straum/oppvarming. Vi vil då rekne ut eit gjennomsnitt per månad.

Ved særskild høge straumprisar, kan vi berekna dei gjennomsnittlege utgiftene på andre måtar. 

Har du samvær med barn, treng vi ein kopi av samværsavtalen og kopiar av kvitteringar for reiseutgifter du pliktar å betale.

Har du særskilde utgifter til helse eller medisinar utover frikortordninga, må du dokumentere desse. Slik dokumentasjon kan vere

• ei utskrift over medisinar frå apoteket
• ei stadfesting frå ein lege eller behandlar om at utgifta er nødvendig, og ikkje blir dekt av det offentlege

Du må også dokumentere kven legen eller behandlaren er, kor mykje behandlinga kostar totalt og kor lenge behandlinga varer.

Utgifter til transport i samband med medisinsk behandling blir dekte gjennom andre offentlege ordningar. Vi tar derfor ikkje omsyn til desse utgiftene når vi vurderer saka di.

Livsopphaldssatsen legg til grunn bruk av kollektiv transport mellom heimen og arbeidsstaden. I nokre tilfelle kan vi likevel ta omsyn til at du treng bil og har utgifter til billån:

Du må ha bil for å kunne vere i jobben:
Er du nøydd til å bruke bil til og frå arbeidsstaden, må du sende oss

• ei stadfesting frå arbeidsgivaren din på kor mange kilometer du må køyre per dag og at du ikkje kan bruke kollektivtransport
• kopi av rekning for forsikring på bilen
• kopi av nedbetalingsplan for eventuelt billån

Du er student og treng bil for å fullføre utdanninga:
Du må sende inn ei stadfesting frå utdanningsstaden på at du studerer der.

Du må også dokumentere ekstraordinære utgifter, som til dømes høge tannlegeutgifter, utgifter til konfirmasjonen til ditt eige barn (ikkje gåve) eller utskifting av kvitevarer.